Nos Úniko Salbashon Pa e Gastunan Haltu Di Awa, Koriente, Gas I Gasolin

44 sèn di kada florin ku nos ta paga na koriente ta relashoná ku kombustibel fosil. 44 sèn, ku ta sali pafó di nos pais pa supsidiá otro paisnan su ekonomia, mientras ku di nos mes ta kibrá na wèrki i nos ta mendigá serka Hulanda pa plaka. 

Tur esaki mientras nos por uza solo i bientu pornada. Mesun analogia ta konta pa otro produktonan manera awa, gas pa kushina i gasolin. Gastu di tur e produktonan aki por baha konsiderabelmente si nos uza solo i bientu na lugá di kombustibel fosil. Un kalkulashon brutu hasí- pasó mi no tin e sifranan konkrektu- ta mustra ku pa aña Kòrsou ta saka por lo menos 450 mion florin for di su ekonomia, ku ta na wèrki, manda den ekonomia di otro paisnan mas riku ku nos. Hopi plaka, kiko otro nos por a hasi ku e sèn aki pa nos edukashon, salubridat i ayudo pa esnan menos pudiente?

Nos tur sa ku e asina jamá “cost of doing business” na Kòrsou ta sumamente haltu i ku esaki ta afektá gastu di tur otro produkto i servisio. Si tin un kos ku un Gobièrnu, ku ta traha na bienestar di pueblo, por hasi pa aliviá e situashon penoso ku nos pueblo ta pasando aden, ta atendé pa baha gastunan di awa, koriente, gas i gasolin. 

Nos Kòrsou