Laga Nos Basta Keda Pospone I Bringa Ku Nos Mes. Traha Huntu Pa Nos Por Sobrebibi I No Keda Mendigá.
Awor mas ku nunka mester aselerá e transishon pa uzo di energia alternativo aki na Kòrsou.
Un par di ten pasá, sintá den un restaurant chines, ami ku un par di amigu tabata diskutí e importansia di tin un refineria aki na Kòrsou. Un grupo tabata kere firmemente ku e refineria aki tin su importansia ainda, e otro grupo tabata pensa ku esaki no ta importante mas. Finalmente nos tur a jega na un konklushon, kual mi ta bai komparti ku boso.
Banda di tabata krea kuponan di trabou pa nos hendenan, refeneria mester tabata un fuente grandi pa generá divisa (dollar) pa nos isla.
Si nos waké riba un plano mas haltu; ku e operashon di refeneria nos tabata saka divisas (dollar) for di nos pais pa kumpra kombustibel fossil. Nos tabata rafiná e kombustibel aki, krea produktonan manera gasolin, jet fuel, èts i nos tabata bende e produktonan riba merkado internashonal i asina generá muchu mas tantu divisas (dollar) ku nos tabata saka ku e operashon aki.
Dor ku nos konsumo lokal mes ta asina tiki kompará ku loke nos tabata bende afó, tabata pone ku e efekto di nos konsumo lokal riba nos balansa di pago tabata praktikamente zero. Ku otro palabra komo pais, dor di e operashon di refeneria nos por a paga nos konsumo di energia sin ku esaki mester a wòrdu saká direktamente for di nos ekonomia. Nos tabata por a paga e kombustibel ku nos ta tin mester pa genera nos konsumo lokal ku plaka (dollar) ku nos tabata risibí di afó. Awor ku e operashon di nos refeneria a kai afó - sin algun perspektiva ku esaki ta bini bek- ta for di nos mesun reservanan limita di divisas (dollar) nos mester kome pa kompra di kombustibel fossil, pa por sigui genera energia pa nos konsumo lokal.
Determinashon
Ku eksepshon di turismo, tur nos otro pilarnan ekonomiko ku por a genera divisas a kai afo. Bo mes ta kere ku solamente ku turismo nos por genera sufisiente divisas (dollar) pa por kompli ku tur nos nesesidatnan di importashon komo pais? Kuantu tempo bo ta kere ku nos por sigui wanta e situashon aki komo pais?
Awor ta hopi fasil pa nos kere ku pèrdida di nos refeneria lo afektá solamente esnan ku direktamente òf indirektamente tabata risibí entrada di e operashon di refeneria. Awel ami por bisabo ku si nos no logra desaroya otro pilarnan ekonomiko rápidamente, aki un par’i tempu ni maske nos tin sèn den nos saku nos no por jega pòmpnan di gasolin i kumpra gasolin pasombra komo pais nos no tin sufisiente divasas (dollar) pa kumpra esaki djafó pa tresé paden.
E mesun situashon aki ta konta pa tantu awa, koriente i gas pa nos kushiná.
Mirando ku operashon di nos refeneria ta praktikamente un “gepasseerd station”, nos a konkluhí ku den nos bista, nos úniko solushon viabel na e momentu aki ta pa nos aselerá e transishon di energia fossil pa energia alternativo. Asina nos ta évita di uza nos divisasnan pa kumpra kombustibel fossil.